“Gender bərabərliyi sağlam ailənin təməlidir” mövzusunda keçirilmiş ailə düşərgəsinə yekun vurulub.
Avropa İttifaqının maliyyə dəstəyi, BMT-nin Əhali Fondunun təşkilatçılığı və “Forest School Azerbaijan”nın dəstəyi ilə Quba şəhərində təşkil edilən düşərgəyə ölkənin müxtəlif bölgələrindən 15 ailə qatılıb.
Düşərgənin davam etdiyi 3 gün ərzində iştirakçılar “Cins və gender”, “Məsuliyyətli valideynlik”, “Gender bərabərliyi” mövzularında təlimlərdə iştirak ediblər. Bununla yanaşı, düşərgədə iştirak edən ailələrin övladları üçün “Forest School” təhsil konsepsiyasına uyğun olaraq sosial, emosional, fiziki və intellektual istiqamətli müxtəlif fəaliyyətlər və birgə məşğələlər təşkil olunub.
Sözügedən fəaliyyət Avropa İttifaqının maliyyə dəstəyi ilə həyata keçirilən “Cənubi Qafqazda gender əsaslı cins seçimi və digər zərərli təcrübələrin aradan qaldırılması” proqramı çərçivəsində BMT-nin Əhali Fondu (UNFPA), Əmək və Əhalinin Sosial Müdafiəsi Nazirliyi, Gənclər və İdman Nazirliyi və Ailə, Qadın və Uşaq Problemləri üzrə Dövlət Komitəsinin birgə təşklilatçılığı ilə “Forest School Azerbaijan” tərəfindən icra olunub.
